Gruaja shtatzënë viktimë e trafikimit

Policia e Kosovës ka arrestuar tetë persona të dyshuar për trafikim me qenie njerëzore, të gjithë këta shtetas kosovar, si dhe ka identifikuar një viktimë të trafikimit, 22 vjeçare, të cilës i ishte premtuar martesë. Burime të Telegrafit bëjnë të ditur se viktima e trafikimit është shtatzënë (pesë muajsh), ndërsa ndër të arrestuarit është edhe vjehrra e saj, që dyshohet të jetë e përfshirë në trafikim.

Në njoftimin për media bëhet e ditur se personat janë arrestuar në një fshat të Lipjanit.

“Gjatë hetimeve të rastit hetuesit kanë siguruar prova dhe dëshmi se viktima ishte trafikuar fillimisht nga ana e të dyshuarit kryesor Valon. S (1987) i cili fillimisht i kishte premtuar viktimës martesë. I njëjti dyshohet se më pas sistematikisht përmes kërcënimeve dhe përdorimit të forcës e kishte detyruar viktimën të ofronte shërbime seksuale klientëve të ndryshëm në këmbim të të hollave”, thuhet në njoftim.

Viktima ishte mbajtur nën kontroll për tre muaj dhe të dyshuarit kryesor kanë përfituar shuma të konsiderueshme materiale nga trafikimi i viktimës.

Të dyshuarit e tjerë të përfshirë në këtë rast kanë ndihmuar në bashkëpunim në kryerjen e veprës penale të trafikimit me njerëz.

Viktima aktualisht është strehuar dhe është duke u trajtuar sipas procedurave standarde nacionale për viktimat e trafikimit.

Personat e arrestuar janë: Valon. S 1987, Sevdije S 1965, Hasan. Z 1970, Agron Q, Përparim. K 1984, 6. Hajrije. H 1956, Hazir. M, 1949, Rexhep.T, 1941. /Telegrafi/