Dell përkrah rivendosjen e doganave në veri

Vendimi i Qeverisë së Kosovës për kthimin e policëve dhe doganierëve në veri të Kosovës më 16 shtator, ka gjetur përkrahjen edhe të ambasadorit të Shteteve të Bashkuara të Amerikës në Kosovë, Christopher Dell.

“Ka qenë një e arritur në mes të Qeverisë së Kosovës, EULEX-it dhe KFOR-it. Qeveria e Kosovës i ka të gjitha të drejtat e veta të autorizuara dhe legjitime që të zbatojë këtë marrëveshje të arritur më 2 shtator. Tani presim që të bëhet zbatimi i saj dhe ne e përkrahim atë”, ka thënë ambasadori Dell, transmeton Express.

Është raportuar se Qeveria e Kosovës dhe prania ndërkombëtare në vend janë pajtuar në parim për rikthimin e kontrollit doganor dhe policor në veri, kurse marrëveshja pritet të zbatohet nga 16 shtatori.

Komandën doganore dhe policore do ta kenë autoritetet e Kosovës, pjesa operative do të bie mbi EULEX-in, kurse KFOR-, do t’i kontrollojë rrugët alternative që lidhin dy vendet.

Siç është raportuar, plani është hartuar nga zyrtarë të Qeverisë së Kosovës dhe ai është pranuar në parim nga përfaqësues të EULEX-it, KFOR-it, Bashkimit Evropian dhe Ambasadës së SHBA-së në Prishtinë. /Telegrafi/