Integriteti territorial është i paprekshëm

Presidentja Atifete Jahjaga në ditën e dytë të vizitës në Hungari është pritur me nderimet më të larta shtetërore nga presidenti i Hungarisë, Pal Schmitt, me ç’rast nikoqiri tha se vendi i tij vazhdon të jetë përkrahës i të gjitha proceseve të Kosovës dhe do ta ndihmojë atë në rrugën e saj përpara.

Presidenti hungarez tha se vendi i tij mbështet perspektivën evropiane për Kosovën dhe theksoi se Hungaria ka kërkuar nga të gjithë partnerët evropianë që të vazhdojnë procesin e anëtarësimit për vendet e Ballkanit Perëndimor. Schmitt e bëri të qartë se nuk ka alternativë tjetër për vendet e Ballkanit perëndimor përveç anëtarësimit në BE dhe ky proces, sipas tij, do të përmbyllet pasi të jenë plotësuar kushtet nga këto vende.

Ai tha se është i përkushtuar që të ndihmojë në lobimin për Kosovën te vendet anëtare të BE-së që ende nuk e kanë bërë këtë, veçanërisht te dy fqinjët e Hungarisë, Sllovakia dhe Rumania, të cilat kanë komunitet hungarez në vendet e tyre, dhe që kjo është një nga arsyet pse këto dy vende ende nuk e kanë njohur pavarësinë e Kosovës.

Schmitt ka theksuar se Hungaria do të hapë çështjen e anëtarësimit të Kosovës në nismat rajonale dhe ato ndërkombëtare që do të ndihmonte vendin në thellimin e reformave dhe qartësimin e rrugës evropiane si dhe do të ndihmojë që Kosova të përfitojë nga liberalizimi i vizave. Presidenti hungarez tha se marrëdhëniet e mira mes Kosovës dhe Hungarisë duhet të thellohen edhe më tutje në fushën e ekonomisë dhe theksoi se duhet të inkurajohen bizneset hungareze për të investuar në Kosovë.

Nga ana e saj, presidentja Jahjaga tha se Kosovës i duhet marrëdhënia kontraktuale me BE-në, meqë kjo do të qartësonte rrugën evropiane të saj me marrjen e udhërrëfyesit për liberalizim të vizave. Ajo theksoi se anëtarësimi i plotë i të gjitha vendeve të Ballkanit Perëndimor, përfshirë Kosovën, në BE do të garantonte stabilitetin afatgjatë të rajonit.

Pavarësia e Kosovës është e pakthyeshme dhe integriteti territorial i saj i paprekshëm- qartësoi presidentja. Ajo tha se Kosova ka marrëdhënie të mira me të gjitha vendet fqinje dhe është faktor i paqes dhe stabilitetit në rajon. Jahjaga tha se i ka dhënë përkrahje dialogut me Serbinë, i cili ka filluar të japë rezultate me arritjen e një numri marrëveshjesh, që lehtësojnë jetën e qytetarëve të te dyja vendeve. Ajo tha se në këtë proces të dialogut nuk do të diskutohen çështjet e brendshme të Kosovës dhe integriteti territorial i saj. /Telegrafi/