Turqia mbështet integritetin territorial të Kosovës

Kryeministri i Kosovës, Hashim Thaçi, ka pritur të premten ministrin e Punëve të Jashtme të Turqisë, Ahmet Davutogllu. Në takim është biseduar për aktualitetin politik në Kosovë dhe në rajon, për bashkëpunimin mes dy vendeve dhe për çështje të tjera me interes.

Ministri i Punëve të Jashtme të Turqisë ka vlerësuar lartë bashkëpunimin mes Kosovës dhe Turqisë. Ai ka theksuar se ky bashkëpunim do të thellohet edhe më tej dhe Turqia do të vazhdojë ta mbështesë Kosovën në procesin e njohjeve të reja, ngase ky proces është në interes është në interes të mbarë rajonit, është shprehur ai.

Davutogllu, pos tjerash, ka theksuar se Turqia mbështet integritetin territorial të Kosovës dhe të drejtën e Qeverisë së Kosovës për të shtrirë autoritetin e vet në të gjitha pjesët e Kosovës.

Nga ana e tij kryeministri Thaçi ka ripotencuar angazhimin e Qeverisë së Republikës së Kosovës për thellimin e bashkëpunimit rajonal, në interes të paqes, stabilitetit dhe zhvillimit të gjithmbarshëm të të gjitha vendeve të rajonit.

Sipas një komunikate për media, Thaçi e ka njoftuar kryediplomatin turk me përkushtimet e Qeverisë së Kosovës për shtrirjen e sundimit të rendit dhe ligjit në tërë territorin e Kosovës, me theks të veçantë në pjesën veriore të vendit.

“Të gjitha vendet e rajonit kanë objektiv integrimin në Bashkimin Evropian dhe për ta arritur këtë, ato duhet të respektojnë integritetin territorial të vendeve fqinje. Këtë kusht duhet ta plotësojnë edhe Kosova, edhe Serbia”, ka thënë Thaçi.

Ministri i Jashtëm turk, Davutogllu, pos tjerash, ka theksuar se Turqia mbështet integritetin territorial të Kosovës dhe të drejtën e Qeverisë së Kosovës për të shtrirë autoritetin e vet në të gjitha pjesët e Kosovës. /Telegrafi/