Kanada përkrah integritetin dhe sovranitetin e Kosovës

Kanada përkrah integritetin dhe sovranitetin e Kosovës


Kanada e mbështetë fuqishëm integritetin territorial të Kosovës dhe sovranitetin e saj, tha ambasadori i Kanadasë në Kroaci, Ed Laughlin.
Ai gjatë një takimi me kryetarin e komunës së Mitrovicës, Avni Kastrati tha po ashtu se mbështetë dialogun që pritet të fillojë ndërmjet Kosovës dhe Serbisë për çështje praktike.

Në këtë takim, ambasadori Laughlin, shfaqi besimin se me kohë do të zbatohet edhe në veri Pakoja e Ahtisarit, ku ende ka probleme në këtë drejtim. Ai e ka vlerësuar atë si zgjidhjen më të mirë, që ofron garanci për të gjitha komunitetet.

Ndërkaq, kryetari i Komunës së Mitrovicës, Avni Kastrati duke folur për gjendjen në Mitrovicë ka thënë se në përgjithësi gjendja është e rëndë.

Kastrati njoftoi se ka tensione si pasojë e incidenteve të shpeshta që shkaktohen nga strukturat paralele serbe. “Në veri veprojnë strukturat paralele serbe që dhjetë vjet dhe ato sfidojnë rendin dhe ligjin në gjithë veriun e vendit”, u shpreh kryetari i Mitrovicës.

Poashtu ai foli edhe problemet e banorëve shqiptarë në veri. Ai e njoftoi ambasadorin kanadez se shqiptarët në veri kanë probleme me qarkullim të lirë dhe qasje në pronat e tyre.

Kastrati njoftoi më tej se strukturat paralele serbe janë duke bërë presion jo vetëm te qytetarët shqiptarë, por edhe tek ata serbë, të cilët nuk kanë liri deklarimi politik.

Si hap pozitiv për vendosjen e rendit dhe ligjit në veri, kryetari i Mitrovicës e ka përmendur vendosmërinë e autoriteteve të rendit, të cilat së fundi e kanë rritur praninë e tyre dhe kanë shtuar masat e sigurisë.

Kastrati ka folur edhe për gjendjen e rëndë ekonomike dhe sociale, ndërsa ka falënderuar ambasadorin Laughlin për interesimin e tij dhe për mbështetjen që ka ofruar Kanadaja vazhdimisht për proceset e rëndësishme në Kosovë.