Presioni e zbut Beogradin

Mosreagimi i dhunshëm i strukturave paralele të Serbisë në veri të Kosovës, është arritur pas presionit të vazhdueshëm të BE-së dhe të shteteve më të fuqishme ndërkombëtare ndaj zyrtarëve të Beogradit.

Burime brenda BE-së i kanë thënë “Kohës Ditore” se ka pasur një koordinim mes zyrtarëve të lartë të BE-së, NATO-së dhe disa vendeve anëtare të fuqishme, që të mbajnë kontakte me zyrtarë të ndryshëm të shtetit serb dhe t’u kujtohet atyre se “çdo reagim i dhunshëm do të dëmtojë rëndë pozitën e Serbisë”.

Të njëjta burime kanë shpjeguar në kushte anonimiteti se ndër zyrtarët serbë që kanë qenë vazhdimisht të mbajtur në kontakt nga perëndimorët kanë qenë edhe ministri për Kosovën, Goran Bogdanovic, si dhe kryesuesi i ekipit serb të bisedimeve, Borko Stefanovic.

Të dy këta zyrtarë gjatë gjithë ditës së premte kanë qëndruar në veri, ndërkaq që të instruktuar edhe nga zyrtarë të lartë perëndimorë kanë bërë thirrje për protesta të qeta dhe për evitim të përplasjeve të strukturave paralele me KFOR-in dhe EULEX-in.

“Në çdo moment u është bërë me dije se dhuna vetëm që do të shënojë kthim mbrapa. Nuk do të dëmtoheshin vetëm gjasat e Serbisë për statusin kandidat, por edhe shumë procese të tjera. Dhuna nuk do të dëmtonte vetëm Serbinë por edhe Kosovën”, i ka thënë gazetës zyrtari evropian.

Sipas tij, BE-ja pret edhe më tutje sjellje të përmbajtura të të dyja palëve, por misioni i EULEX-it është i përgatitur që të përgjigjet edhe nëse “ka zhvillime negative”.

Sipas tij, Brukseli është duke e përcjellë në detaje sjelljen e të dyja palëve. Konstruktiviteti i Serbisë në raport me vendosjen e doganierëve kosovarë në pikëkalimet kufitare ka shkuar deri aty sa xhandarmëria serbe nuk ka lejuar që grupe të ndryshme të organizuara të udhëtojnë drejtë Kosovës. /Telegrafi/