Hasan Preteni sërish drejtor i AKK-së

Kuvendi i Kosovës me 54 vota për rizgjodhi Hasan Pretenin për drejtor të Agjencisë kosovare kundër korrupsionit, me mandat pesë vjeçar.

Gjithsej të pranishëm në seancë ishin 94 deputetë.

Për kandidatin tjetër Bashkim Zeqiri votuan 30 deputetë, për Hasan Pretenin 54, ndërsa 10 vota ishin të pavlefshme.

Agjencia kundër Korrupsionit është institucion i pavarur dhe i specializuar për zbatimin e politikave shtetërore për luftimin dhe parandalimin e korrupsionit.

AKK ushtron përgjegjësitë e përcaktuara me Ligjin Nr. 03/L-159 për Agjencinë kundër Korrupsionit, Ligjin Nr. 03/L-151 për Deklarimin, Prejardhjen dhe Kontrollin e Pasurisë dhe të Dhuratave të Zyrtarëve të Lartë Publik, Ligjin për Parandalimin e Konfliktit të Interesit në Ushtrimin e Funksionit Publik Nr. 02/L-133 i ndryshuar dhe i plotësuar me Ligjin Nr. 03/L-155.

Qëllimi dhe puna e AKK-se thuhet se është e përqendruar në zbulimin dhe hetimin e rasteve korruptive, përpjekjeve për parandalimin dhe luftimin e fenomenit të korrupsionit, për të ndihmuar në ndërtimin e një shoqërie të shëndosh e të përparuar kosovare dhe që bazohet në shtetin e së drejtës.

AKK-ja është i pari institucion i pavarur në vend i ngritur pa ndihmën paraprake të organizmave ndërkombëtare po është tërësisht i mbështetur në kapacitetet vendore. Fondet për funksionimin e Agjencisë sigurohen nga Buxheti i Konsoliduar i Kosovës, në bazë të propozimit të Agjencisë, i cili vendos dhe mbi mënyrën se si do të përdoren fondet e aprovuara.
/Telegrafi/