Preteni anulon tenderin e Kuçit

Tenderi i Ministrisë së Drejtësisë (MD) për furnizim me mish të burgjeve është anuluar përfundimisht. Kjo është bërë me kërkesën e shefit të Agjencisë Kundër Korrupsionit, Hasan Preteni, përfaqësuesit të Komisionit Rregullativ të Prokurimit Publik si dhe ministrit të kësaj ministrie, Hajredin Kuçi.
“Zëvendëskryeministri dhe ministri i Drejtësisë, Hajredin Kuçi u takua me Hasan Pretenin, kryetar i Agjencisë Kundër Korrupsionit dhe me Safet Hoxhën, kryetar i Komisionit Rregullativ të Prokurimit Publik. Në këtë takim në të cilin ishte i ftuar edhe kryetari i Organit Shqyrtues të Prokurimit, u bisedua për problemet që janë shfaqur në tenderin ‘Furnizim me mish dhe produkte të mishit’, thuhet në një komunikatë për shtyp të MD-së.

Ky tender, për të cilin ka shkruar gazeta “Zeri” pas një kohe që kishte kaluar nëpër OSHP, dhe përplasjeve mes saj dhe autoritetit tjetër të prokurimit, Komisionin Rregullativ të Prokurimit Publik, përfundoi me shpalljen fitues po të asaj kompani që kishte kontestuar vendimin parë të MD-së për ta shpërblyer me këtë tender kompaninë “Apetiti” nga Vushtrria, me pronar Destan Ferizin, për 502,800 euro.

Kështu, herën e fundit ishte shpallur fitues kompania “Hajdini Commerc” nga Drenasi, me pronar Musaj Leku, për një çmim prej 363.355 eurosh. Kjo kompani pati fituar këtë tender edhe në vitin 2009, në vlerë prej 476 mijë eurosh, shkruan Zëri.

Reagimet nisën kur kompania “Hajdini Commerce” nga Drenasi, në dosjen e tenderit pati bashkëngjitur edhe garancinë e obliguar bankare, por që për shkak të gabimit të bankës, i njëjti ka qenë me afat të skaduar. Në këtë rast, Komisioni për Vlerësim, i formuar në MD, vlerësoi se kompania në fjalë duhej të eliminohet nga gara.

E pakënaqur me këtë vendim, kjo kompani dy ditë pasi e humbi garën, u ankua në OSHP, ku edhe e fitoi rastin.

Por, edhe MD-ja ishte ndarë e pakënaqur dhe kërkoi interpretim ligjor të LPP-së në Komisionin Rregullativ të Prokurimit Publik. Krejt kundër vendimit të OSHP-së, ky komision pati vendosur në favor të Ministrisë së Drejtësisë, duke konstatuar se eliminimi i kompanisë “Hajdini Komorec” nga Drenasi, pasi që asaj i mungonte garancia e vlefshme bankare, ishte vendim i drejtë.

Megjithatë, duke pasur parasysh që në hierarkinë e institucioneve të prokurimit vendimet e OSHP-së janë përfundimtare, Ministria e Drejtësisë veproi sipas urdhrit kësaj të fundit, dhe e çoi krejt tenderin në rivlerësim. Rezultati i kësaj ishte që pikërisht kompania e eliminuar nga gara të fitojë tenderin në fjalë.

Tashmë ky vendim është anuluar, edhe pse i njëjti nuk është publikuar ende në faqen zyrtare të Komisionit Rregullativ të Prokurimit Publik, por vetëm është bërë i ditur me anë të një komunikate për shtyp të MD-së. /Telegrafi/