Kandari i Kuçit

Zëvendëskryeministri Hajredin Kuçi, njëherësh ministër i Drejtësisë - dy ditë pas vizitës së Borko Stefanovicit - ka sqaruar shumëçka rreth hapave që u ndërmorën përpara ardhjes së kryenegociatorit serb në Prishtinë.
Ai nuk pranon që pala kosovare t’i jetë nënshtruar presionit. Sipas tij, bëhet fjalë për sugjerime ndërkombëtare.

“Kosova nuk ka presion ndërkombëtar asnjëherë. Kosova ka sugjerime dhe i ka miq ndërkombëtarët. Dhe, çelësi i suksesit të Kosovës ka qenë, duke e ruajtur unitetin nacional dhe duke e ruajtur partneritetin me bashkësinë ndërkombëtare”, ka deklaruar Kuçi për Express.

Sipas tij, Kosova çdoherë duhet të jetë në orientim me BE-në dhe SHBA-të, ngase mendon se çdo lëvizje tjetër nga ky qëndrim ndaj kujtdo qoftë, kurdo qoftë është gabim.

“Sugjerimet që vijnë nga BE-ja dhe SHBA-të nuk janë presione, janë miq që kanë kontribuar në lirinë, pavarësinë dhe qëndrueshmërinë që e ka Kosova sot”, ka thënë Kuçi.

Vizita e zyrtarit serb në Prishtinë është komentuar si një avantazh i Serbisë në procesin e dialogut për shkak të mesazheve që ky shtet dërgoi me këtë vizitë në Bruksel.

Ai ka thënë se kjo punë nuk është “çështje peshoreje” dhe se problemet zgjidhen në tavolinë. /Telegrafi/