Serbia po i sjell serbët e Kosovës para një katastrofe

Lideri i Partisë Liberal Demokratike të Serbisë, Cedomir Jovanovic, ka kërkuar ndryshimin e politikës së Beogradit zyrtar ndaj Kosovës, përndryshe siç ka thënë ai, me këtë qasje të Serbisë do të pësojnë serbët në Kosovë.

Jovanovic ka thënë se nuk është e nevojshme të pësojnë serbët në veri të Kosovës duke u konfrontuar me KFOR-in dhe EULEX-in, dhe se këtë situatë mund ta ndërpres pushteti në Beograd. “Nëse Serbia nuk e ndërpret këtë politikë, nëse nuk reagon për qetësimin e situatës në veri të Kosovës ku ka edhe të plagosur, atëherë të gjithë serbët që jetojnë në këtë pjesë të Kosovës do të ndodhen para një katastrofe”, ka thënë Jovanovic njofton B92.

“Autoritetet në Beograd duhet të kërkojnë nga serbët e veriut të Kosovës që të qetësohen, të tërhiqen nga barrikadat dhe të shpërndahen nëpër shtëpitë e tyre. Beogradi duhet t’jua bëj të qartë serbëve në Kosovë se Plani i Ahtisaarit është bazë e mirë, është zgjidhe për të gjithë serbët që jetojnë në Kosovë”, ka thënë Jovanovic, duke shtuar se “aktualisht Serbia ndodhet në ‘këndin e vdekur’ nëse nuk ndryshon politikën ndaj Kosovës”. /Telegrafi/