Roma bëhet me hotelin e parë prej mbeturinave

Romë, 5 qershor - Ekologët evropianë kanë ndërtuar në Romë hotelin prej mbeturinave, për të tërhequr vëmendjen për ndotjen e plazheve evropiane, raporton BBC.

Hoteli “Save the Beach” (Shpëtoni plazhin), në të cilin mysafirët mund të qëndrojnë më së shumti katër ditë, është dekoruar me mbeturinat e mbledhura në plazhet e gjithë botës.

Në pesë dhomat e tij dhe recepsion gjenden 12 tonë mbeturina, duke përfshirë edhe lojëra, konserva dhe pjesë të automobilave. Manekinia danez Helena Kristensen, e cila qëndroi në hotel, tha se bëhet fjalë për një vepër të rëndësishme arti.

“Mund të ecni rreth tij dhe të shihni vepra për të cilat do të pyetni se pse njerëzit i kanë lënë në plazh”, shtoi ajo.

Hoteli është ndërtuar nga artisti gjerman Ha Schultz.


“Jetojmë në kohën e mbeturinave. Pas nesh mbeten mbeturinat, ndërsa edhe ne mbeturina do të bëhemi. Për këtë, ky hotel është pasqyre e gjendjes aktuale. Duhet të ndryshojmë botën para se bota të na ndryshoje ne”, tha Schultz. Ata që dëshirojnë të jenë mysafirë të këtij hoteli duhet të shpejtojnë pasi ai do të hapet më 7 qershor.