Aktivistët deportohen nga Izraeli

Ministria e Brendshme izraelite tha se të 19 personat në bordin e një anijeje që u parandalua të thyejë bllokadën e Izraelit të Gazës kanë nënshkruar dokumentet e deportimit.
Anija me pronësi irlandeze 'Rachel Corrie', u diktua nga marina izraelite dhe u dërgua në portin Ashdod. Forcat izraelite thanë se nuk kishin hasur në qëndresë nga 11 aktivistët dhe tetë anëtarët e ekuipazhit.

Izraeli njoftoi se procesi i lëvizjes së aktivistëve pro-palestinezë nga anija Rachel Corrie kishte shkuar pa probleme.

Aktivistët nuk kanë folur ende, por grupi që organizoi flotën në Gazë e ka bërë të qartë se gjithçka kishte ndodh nën presionin izraelit, megjithëse izraelitët nuk kishin përdorur kësaj radhe forcat e armatosura.

Grupi Free Gaza tha se planifikonte të dërgonte më shumë anije në të ardhmen. Ngjarjet e javës së fundit duket se e kanë arritur pjesërisht qëllimin e aktivistëve. Madje edhe aleati më u fuqishëm i Izraelit, SHBA-ja thotë se mënyra se si Izraeli po e menaxhon bllokadën në Gazë është e paqëndrueshme dhe duhet të ndryshojë. /bbc/