BE mund të kontrollojë ngarkesat e anijeve për Gazën

Përballë kritikës në rritje kundër bllokadës izraelite ndaj Rripit të Gazës Franca dhe Britania e Madhe propozuan mbikëqyrjen e livrimeve me anije për territorin palestinez prej Bashkimit Evropian.
BE-ja mund të ndihmojë që kontrabanda e armëve të pengohet dhe që njerëzit në Rripin e Gazës të marrin megjithatë mallrat e domosdoshme të ndihmës, thanë ministrat e jashtëm Bernard Kouchner dhe William Hague pas një takimi në Paris.

Sipas tyre, gjendja e tanishme është e papranueshme. Siç e kishte bërë më parë sekretari i përgjithshëm i OKB-së Ban Ki Moon, edhe ministri i jashtëm francez, Kouchner i bëri thirrje Izraelit që të pranojë një hetim ndërkombëtar të ndërhyrjes së përgjakshme të një jave më parë kundër flotës së ndihmës për Gazën.

Por Izraeli e refuzon në mënyrë strikte këtë. Gjatë ndërhyrjes ushtarake u vranë nëntë veprimtarë pro-palestinezë nga Turqia. /DW/