Pavarësia- një mbërritje, por edhe një pikënisje e re

Mbretëria e Bashkuar është partner strategjik për Kosovën, jo vetëm në kuptim të marrëdhënieve midis dy vendeve, por edhe në relacionet ndërkombëtare të Kosovës- ka thënë kryetari i Kuvendit, Jakup Krasniqi, në fjalën e tij me rastin e Ditës Kombëtare të Mbretërisë së Bashkuar.
Krasniqi ka thënë se gjatë këtyre dy viteve të pavarësisë, Kosova ka ndryshuar shumë, duke bërë përparime të dukshme në të gjitha fushat, ndërsa ka falënderuar Mbretërinë e Bashkuar për rolin e veçantë e historik “në mbrojtjen e drejtësisë karshi çështjes së Kosovës, në rindërtimin e rimëkëmbjen e vendit tonë të dalë nga lufta shkatërruese, në ngritjen e themeleve të Kosovës së re dhe në sigurinë e njohjen ndërkombëtare të pavarësisë së saj”.

“Atdheu i Mbretëreshës Elizabeth II është njëri nga kontribuuesit më të mëdhenj të kësaj të arriture historike të Kosovës. Pavarësia është një mbërritje, por në të njëjtën kohë dhe një pikënisje e re”, është shprehur kryekuvendari, duke shprehur mirënjohjen e thellë për gjithë çfarë ka bërë Mbretëria e Bashkuar për Kosovën dhe qytetarët e saj.

Ai ka thënë se Kosova pret nga Mbretëria e Bashkuar dhe nga gjithë miqtë, të vazhdojnë mbështetjen në prioritetin strategjik të integrimeve euroatlantike, pasi ky është vullneti dhe përcaktimi i qytetarëve të Kosovës dhe alternativa jonë e vetme.