FIFA i frikësohet kurdisjes së ndeshjeve të xhiros së tretë

Johannesburg, 19 qershor - Ndeshjet e xhiros së fundit të fazës grupore të Botërorit 2010 të futbollit do të monitorohen së afërmi nga FIFA, pasi në këto ndeshje mund të ketë kurdisje. Këtë e ka thënë vetë FIFA të premten.
Çdo ndeshje e Botërorit 2010 po përcillet me përpikëri nga sistemi i ri i FIFA-s që zbulon bastet ilegale.
Drejtori ligjor i FIFA-s, Marco Villiger thotë se FIFA është duke përcjellë me kujdes të shtuar ndeshjet e fundit të fazës grupore, pasi ato janë më të rrezikuarat.
Dy përfaqësueset e para nga secili grup kalojnë në raundin e dytë. Në ndeshjet e treta, që janë të fundit në grup, do të ketë skuadra që nuk do të kenë fare rast të kualifikohen në raundin e dytë dhe për këtë arsye FIFA e ka ndërmend të monitorojë ato skuadra se si u qasen ndeshjeve.
"Këto janë ndeshje të rrezikut të lartë sa i përket perspektivës së basteve. Kurdisja e ndeshjeve është rreziku më i madh që po i kanoset futbollit në këtë moment dhe ka shumë rrezik të ndodhë ndonjë kurdisje në ndeshjet e fundit të fazës grupore, veçanërisht nëse në ndeshje janë të përfshira skuadrat që e kanë siguruar kualifikimin apo skuadrat që nuk kanë gjasa të kualifikohen. Ne do të fokusohemi te ato skuadra që janë kualifikuar apo kanë humbur gjasat. Unë them se këto ndeshje janë të rrezikut të lartë", ka thënë Villiger.
FIFA ka informuar çdo federatë nacionale, lojtarë, trajnerë, anëtarë të delegacionit e gjyqtarë, para fillimit të turneut, se do të përcjellin me kujdes parregullsitë.
"Unë nuk do të thosha se Kampionati Botëror do të jetë shënjestër e mafies së basteve, por duhet të jemi të përgatitur për çdo gjë", ka thënë Villiger.
Një linjë e telefonit është vendosur për të lidhur çdo lojtar, trajner apo gjyqtar. Ata mund të kontaktojnë menjëherë FIFA-n në kushte anonimiteti nëse i vjen një ofertë nga mafia.
"Ka rrezik, por ne po punojmë së bashku me UEFA-n, Interpolin dhe 400 bastore në mbarë botën për të mbajtur sportin të pastër", ka thënë Villiger.