S’i frikësohet Thaçit në garën për president

Zëvendëskryeministri Behgjet Pacolli ka vlerësuar se energjinë kryesore tashmë po e shpenzon në lobim, me të cilin aktivitet është ngarkuar nga kryeministri Hashim Thaçi. Thotë se po bën një punë të jashtëzakonshme, veçanërisht në kontinentin e Afrikës. Por, sipas tij njerëzit atje s’po e presin në cilësinë prej zëvendëskryeministri, ndërkaq për të vënë kontakte me njerëz vendimmarrës po e shfrytëzon bagazhin prej biznesmeni.

Pacolli, në intervistën dhënë gazetës Koha Ditore, ka thënë se i ka ndarë detyrat me ministrin e Jashtëm Hoxhaj dhe se terren të tij ka lobimin. Për kryediplomatin ka thënë se merret kryesisht me forcimin e marrëdhënieve me shtetet që e kanë njohur pavarësinë e Kosovës.

Partneri qeveritar kryesor i Thaçit ka treguar për vizionet ndryshe që subjektet politike brenda ekzekutivit kanë për ekonominë, procesin e privatizimit dhe për ndërmarrjen “Trepça”. Ka përmendur ministrin Beqaj, si njeri me të cilin nuk ka pasur përvojë të mirë. E ka quajtur të tejkaluar një problem me të, por ka pranuar se nuk janë në një linjë për politikat ekonomike.

Në anën tjetër ka lavdëruar zëvendësen e tij në parti, që është edhe zëvendëskryeministre. Për Mimoza Kusari-Lilën ka thënë se “falë punës së saj ekskluzive”është vendosur masa e reciprocitetit ndaj Serbisë dhe që sot Serbia ka pranuar vulat e Doganave të Kosovës.

Megjithëkëtë, ka thënë të jetë në dorë të kryeministrit të vendosë gjatë muajit se kë do ta largojë e kë jo, pas një procesi vlerësimi që do t’i bëjë punës së anëtarëve të kabinetit qeveritar.

Çfarëdo që do të ndodhë me riformatim, sipas Pacollit, subjekti që përfaqëson do të mbetet në Qeveri. Vetë ai s’ka përjashtuar mundësinë që të largohet. Mund të kandidohet për president, dhe thotë të mos i frikohet garës për këtë post as nëse për kundërkandidat do ta ketë Thaçin.

Thaçi e ka ndërprerë Pacollin gjatë intervistës njëorëshe që i ka dhënë gazetës. Edhe ai i ka telefonuar. E, gjatë kësaj kohe ka marrë edhe një telefonatë nga ministri Hoxhaj. Atij i ka thënë se po u tregon gazetarëve se nuk kanë përplasje mes vete. Kjo, pavarësisht se nuk ka mundur të arsyetonte luftën për merita në lobim që kabineti i tij dhe ai i ministrit Hoxhaj kanë bërë jo më larg se muajin e shkuar, kur shteti i Shën Lucias e ka njohur Kosovën. /Telegrafi/