Tahiri: Stefanovic po i frikësohet opinionit për ta thënë të vërtetën

Shefja e delegacionit të Kosovës, Edita Tahiri për bisedime me Serbinë ka thënë se në rundin e fundit të bisedimeve në Bruksel janë marrë vesh për njohjen reciproke të vulave doganore, duke shtuar se marrëveshja do të zbatohet në përputhje me rregullat e CEFTA-s.

Për gazetën Blic në Beograd, Tahiri ka thënë se gjithashtu aty është edhe njohja e vulave doganore të Republikës së Kosovës që i ka përdorur Kosova pas shpalljes së pavarësisë bashkë me emërtimin e vulës doganore që e ka propozuar Serbia.

Duke u përgjigjur në pyetjen se a ka ndonjë dëshmi për pohimin se Serbia ka njohur vulat e Republikës së Kosovës, kryenegociatorja e Kosovës është përgjigjur: “Mund të kërkoni nga negociatori juaj Stefanovic që t’ua japë tekstin e marrëveshjes dhe do të shihni. Unë medieve tona do t’ua paraqes tekstin, e po presim letrën zyrtare të Cooperit me tekstin zyrtar”.

Ajo më tej ka njoftuar se pasi të jenë të gatshme palët, do të fillojë zbatimi i marrëveshjes e parimisht është marrë vesh që kjo të bëhet më 10 shtator kur dhe do të fillojë zbatimi i marrëveshjes për tregti të lirë.

Sipas Tahirit, mallin dhe automjetet do t’i kontrollojnë institucionet e Qeverisë së Kosovës, policia dhe dogana. “Natyrisht, do të bashkëpunojmë edhe me forcat ndërkombëtare të KFOR-it e EULEX-in”, është shprehur ajo.

Duke komentuar deklaratat e zyrtarëve serbë se është arritur marrëveshja vetëm për vulën dhe se marrëveshja është neutrale ndaj statusit, Tahiri ka thënë se që në takimin e parë është kërkuar që Serbia të njohë vulat ekzistuese në të cilat shkruante Doganat e Kosovës.

Stefanovic ka ofruar opsione të tjera si Vulat e EULEX-it. Kjo për ne nuk ka qenë e pranueshme. Mendoj se Stefanovic po i frikësohet opinionit në Serbi për ta thënë të vërtetën, ka vlerësuar Tahiri. /Telegrafi/