AGPK: EULEX-i ta zbardhë të vërtetën

Asociacioni i Gazetarëve Profesionistë të Kosovës është njoftuar se EULEX-i ka ngritur aktakuzë kundër Rexhep Hotit, pronar i së përditshmes “InfoPress” dhe katër bashkëpunëtorëve të tjerë të kësaj gazete, si dhe ndaj kryetarit të komunës së Skenderajt, Sami Lushtaku.
“Aktakuza ka të bëjë me sulmin e zyrtarëve të Komunës së Skenderajt ndaj gazetares dhe kameramanes së emisionit ‘Jeta në Kosovë’, dhe me një seri shkrimesh që patën pasuar në të përditshmen ‘InfoPress’ në qershorit të vitit 2009, ku moderatorja e emisionit ‘Jeta në Kosovë’ Jeta Xharra, veç tjerash qe vlerësuar edhe si “spiune e Serbisë””, thuhet në komunikatë.

AGPK edhe para dy vitesh pati kërkuar nga autoritetet e drejtësisë që të merren me rastin dhe të zbardhin të vërtetën. AGPK e sheh me shqetësim dhe dyshim hezitimin dyvjeçar të autoriteteve vendore të drejtësisë në Kosovë që të ndërmarrin diçka në këtë drejtim.

“Edhe pse i vonuar, për AGPK-në ky vendim është i mirëseardhur. Në të njëjtën kohë, AGPK kërkon nga EULEX-i gjykim të drejtë dhe transparentë të rastit. AGPK inkurajon gazetarët dhe mediat që të përfillin standardet profesionale gjatë raportimit te tyre”, thuhet në komunikatë. /Telegrafi/