ICRC kërkon nga Beogradi të zbardhë fatin e të gjithë të zhdukurve

Lajmi i fundit për zbulimin e varrit masiv në Rashkë të Serbisë me 250 deri në 450 kufoma të civilëve të vrarë shqiptarë gjatë luftës në Kosovë, padyshim është mirëpritur jo vetëm nga familjarët e viktimave dhe autoritetet e Prishtinës, por edhe nga ICRC-ja dhe organizata tjera ndërkombëtare, i ka deklaruar të përditshmes “Bota sot” Christian Cardon, përgjegjës për media në Komitetin Ndërkombëtar të Kryqit të Kuq (ICRC) në Gjenevë.
Madje, sipas tij, ky është edhe një rezultat i përpjekjeve të komuniteti ndërkombëtar i angazhuar gjatë kësaj decenie në rajon. “Procesi i të zhdukurve për ne nga ICRC gjithnjë mbetet preokupim i ynë, që sa më parë viktimat, të zhdukurit e luftës në Kosovë dhe ish-Jugosllavi të zbulohen nga autoritet në rajon”, thotë Cardon, i cili nga autoritetet e Beogradit kërkon një qasje më serioze në hulumtimin e varrezave të reja në Serbi, pas zbulimit të varrezës masive në Rashkë me të paktën 250 trupa shqiptarë.

Në listën e organizatës së ICRC-së gjenden 1.862 persona të zhdukur. Në marsin e vitit 2004 CICR kishte ngritur një grup të përbashkët, komision ekspertësh për hulumtimin dhe zbulimin e të zhdukurve që në atë kohe ishin në lista 3.000 persona nga Kosovë.

"Delegacionet zyrtare të Prishtinës dhe të Beogradit janë të angazhuara për të avancuar procesin dhe përpjekjet e hulumtimit të të zhdukurve në Kosovë, sidomos për të qëndruar në kontakt me familjarët e tyre, duke ju shërbyer atyre informacione rreth më të dashurve të tyre ende të pagjetur...", deklaroi ndërkaq, Lina Miliner drejtuese e Grupit Punues të ICRC -së në Prishtinë. /Bota Sot