Sky Petroleum “merr” naftën e Shqipërisë

Tiranë, 24 qershor - Në jug të Shqipërisë do të kërkohet për gaz dhe naftë dhe për këtë tashmë është nënshkruar marrëveshja. Kërkimi për lëndët djegëse tejet të rëndësishme i është besuar kompanisë amerikane "Sky Petroleum", raporton gazeta elektronike Start.

Investimi i kompanisë Sky Petroleum për kërkimin e naftës dhe të gazit në Bllokun 4 dhe 5 dhe në zonën e Dumresë është rreth 7-8 milionë dollarë, ndërsa parashikimet flasin për një potencial naftëmbajtës deri në 900 milionë fuqi (barelë).

Ministri i Ekonomisë, Tregtisë dhe Energjetikës, Dritan Prifti, ka sqaruar se kërkimet do të bëhen në disa zona të vendit. "Sapo kam firmosur një marrëveshje të re hidrokarburesh për kërkime në tre blloqe të Shqipërisë, në Bllokun 4 dhe 5, si dhe në bllokun e Dumresë, me kompaninë amerikane "Sky Petroleum", tha Prifti.

"Kkemi marrë angazhimin që të kërkojmë në blloqet e jugut, që përfshin Sarandën, Gjirokastrën, Vlorën e deri në Tepelenë dhe në bllokun e zonës së Dumresë, për t’u investuar 7-8 milionë dollarë për kërkimin e naftës dhe të gazit në këtë zonë, e cila ka një potencial naftëmbajtës deri në 900 milionë barelë, të paktën nga parashikimet", tha ministri Prifti..

Duke çmuar kompaninë Sky Petroleum për angazhimin e saj për të investuar në Shqipëri, ministri Prifti bëri të ditur se me këtë marrëveshje mbyllet eksplorimi i një zone shumë të rëndësishme të vendit. Sipas tij, "me këtë marrëveshje mbyllet një zonë shumë e rëndësishme, që e mendojmë me potencial të madh naftëmbajtës dhe gazmbajtës për t’u eksploruar plotësisht dhe deri në fund, të paktën për një hark kohor disa vjeçar, sipas marrëveshjes”.

Puna për këto kërkime do të nisë brenda tre muajsh, ndërsa në fillim të vitit tjetër do të fillojë puna konkrete në blloqe.