Limaj: EULEX-i nuk ka gjetur asgjë antiligjore

Limaj: EULEX-i nuk ka gjetur asgjë antiligjore



Në një intervistë dhënë RTK-së, ministri i Transportit dhe Postë-Telekomunikacionit, Fatmir Limaj, ka thënë se EULEX-i gjatë bastisjeve në MTPT dhe në shtëpinë e tij nuk ka arritur të gjejë asgjë antiligjore.
"Në ditën e kontrollit kam dhënë një deklaratë se në këtë vend respektohet ligji, normat dhe jam i gatshëm të bashkëpunoj me organet e drejtësisë për të dalë e vërteta në dritë", ka thënë Limaj, duke shtuar se organet e drejtësisë duhet të kryejnë punët e tyre, pa ndërhyrje politike dhe pa interferime në këtë proces.

Zëri citon Limajn të ketë thënë se ai dhe Qeveria e Kosovës nuk kanë qenë në dijeni për aksionin e EULEX-it. Ministri i ka hedhur poshtë pohimet e disa mediave se serverët e MTPT-së kanë qenë të fshirë, por sipas tij serverët nuk kanë qenë kurrë nën menaxhimin e MTPT-së, por nën kontrollin e MAP-së dhe të qeverisë.

Limaj ka thënë se nëse vetëm një cent vërtetohet se është keqpërdorur nga MTPT-ja, atëherë ai do të marrë të gjitha përgjegjësitë. Hetimet ndaj tij ai i ka quajtur një gabim shumë të madh, ndërsa nuk ka dashur të komentojë nëse do të japë dorëheqje si akt moral. /rtk/zëri