Takimi i katër presidentëve vitin e ardhshëm në Ohër

Presidenti i Maqedonisë, Gjorgje Ivanov ka paralajmëruar se vitin e ardhshëm ai do të jetë organizator i minisamitit ballkanit të presidentëve që do të mbahet në Ohër.
Këtë e deklaroi Ivanov në konferencën me mediat nga takimi i përbashkët i katër presidentëve të vendeve të rajonit të mbledhur për dy ditë në Prevallë të Prizrenit.

“Krejt kjo tregon se në rajon ndryshon ambienti, kjo tregon një pasqyrë pozitive për ne. Dhe në atë frymë unë i ftova presidentët që vitin e ardhshëm të jenë mysafirë në Ohër në Maqedoni”, ka theksuar Ivanov. Ai ka vlerësuar lartë marrëdhëniet midis Kosovës dhe Maqedonisë, duke paralajmëruar nënshkrimin e marrëveshjeve tjera dypalëshe.

Maqedonia dhe Kosova e zgjidhën çështjen kontestuese rreth demarkacionit të kufirit, pastaj vendosën marrëdhënie diplomatike, i hapën edhe ambasadat mes nesh, deri tani kemi nënshkruar 6 ose 7 marrëveshje bilaterale, presim edhe 5 për nënshkrim. Kjo tregon vetëm se korniza ligjore mes dy shteteve është duke u rregulluar dhe të gjitha çështjet problemet që i kemi i zgjedhim në mënyrë institucionale”, ka nënvizuar presidenti Ivanov. /INA/