Vazhdon ‘pingpongu politik’ Thaçi-Sejdiu

Kryetari i Partisë Demokratike të Kosovës, Hashim Thaçi, ka vazhduar “pingpongun politik” me ish presidentin Fatmir Sejdiu, duke deklaruar se arsyeja e prishjes ishte përplasja e koncepteve.
Kryeministri Thaçi, njëherësh kryetar i PDK-së në një konferencë për media ka thënë se ishte momenti kur është dashur të rreshtohen nga ana kushtetuese dhe ligjore, pavarësisht siç tha ai kërkesave që mos ta ndiqnin atë rrugë.

Duke mos dashur të thotë asgjë më tepër lidhur me debatin që është ngjallur ndërmjet tij dhe Sejdiut, kryeministri Thaçi tha se nuk ka asgjë çfarë t’i shtojë asaj që ka thënë ditë më parë.

Thaçi të dielën kishte deklaruar se në kohën kur Gjykata ka vlerësuar se Sejdiu ka shkelur Kushtetutën, atij i është kërkuar ta mbrojë Sejdiun. Ndërkaq, vet Sejdiu ka mohuar një gjë të tillë, ndërsa LDK ka kërkuar nga Thaçi që të dalë me emra konkretë, nëse një gjë e tillë është e vërtetë.Kryetari i Partisë Demokratike të Kosovës, në konferencën për media ka deklaruar po ashtu se PDK-ja do të mirëpresë çdo vendim që vjen nga Kuvendi i Kosovës lidhur me mbajtjen e zgjedhjeve të jashtëzakonshme.

Ndryshe, në këtë konferencë u prezantuan edhe anëtarësimet e reja. Në këtë parti aderuan, Berat Buzhala ish-kryeredaktor në gazetën Express, Ilir Mirena ish-redaktor,Gëzim Kasapolli nga Partia Social Demokrate, pastaj Petrit Selimi, basketbollisti Florian Miftari etj.

Me këtë rast, Buzhala e cilësoi Thaçin “hero të gjallë”, dhe arritjet e gjertanishme sipas tij i atribuohen Thaçit. Ky i fundit u shpreh se PDK-ja është e hapur për njerëz me vlera të larta njerëzore dhe intelektuale.