Qeveria e mbetur bie, zgjedhjet më 12 dhjetor?

Prishtinë, 30 tetor- “Qeverisë gjysmake” të kryeministrit Hashim Thaçi i kanë mbetur vetëm edhe tri ditë legjitimitet. Të martën do të mblidhet Kuvendi i Kosovës për ta votuar mocionin e mosbesimit të Qeverisë, të cilin e ka iniciuar AKR-ja, dhe me këtë rast pritet të shënohet edhe fundi i parakohshëm i qeverisjes aktuale. Ky akt pritet të përcillet edhe me shpërbërjen e Kuvendit, në mënyrë që të hapet rruga për zgjedhje të parakohshme brenda këtij viti. Me rënien e Qeverisë, i gjithë kabineti i ministrave të mbetur të kryeministrit Thaçi do të funksionojë në dorëheqje, deri në zgjedhjen e Qeverisë së re. Kurse në Kuvend do të jetë aktive vetëm Kryesia, pasi kështu është e përcaktuar me Rregullore të Punës së Kuvendit.
Zyrtarë të Qeverisë kanë paralajmëruar se brenda pak ditësh do ta plotësojnë me kuadro të reja politike vakuumin e krijuar në gjashtë ministri, pas largimit të LDK-së nga koalicioni qeverisës, me qëllim të zhbllokimit të shumë marrëveshjeve dhe tenderëve, që kanë mbetur të pezulluar për shkak të mungesës së ministrave.
Konform Ligjit për zgjedhje të përgjithshme, zgjedhjet në raste të tilla nuk mund të mbahen më herët se 30 ditë e as më larg se 45 ditë pas shpërndarjes së Kuvendit. Nëse numërimi i ditëve fillon nga 2 nëntori, atëherë afati më i largët kohor për mbajtjen e zgjedhjeve do të jetë 12 dhjetori, datë kjo që konsiston me ditën e diel. Ndryshe nga zgjedhjet e rregullta, që përcillen me fushatë një mujore, ato të parakohshmet kufizohen në 10 ditë.
A ka nënshkrime të manipuluara në mocionin për votëbesim të qeverisë, kush mendon se shtatë nënshkrime në të nuk janë të vërteta, çka mendojnë në PDK, LDK, AAK dhe AKR, kujt i ngutet e kush dëshiron vonim, lexoni në numrin e sotëm të gazetës Koha Ditore.