KQZ-ja harton planin operacional për zgjedhjet

Prishtinë, 3 nëntor - Komisioni Qendror i Zgjedhjeve ka hartuar planin operacional për zgjedhjet e 12 dhjetorit. Kryetarja e KQZ-së, Valdete Daka në një konferencë për media ka bërë të ditur se bazuar në rregulloret dhe ligjet në fuqi, të gjitha afatet kohore për këto zgjedhje janë shkurtuar. Këtu përfshihen certifikimi i partive politike, deklarimi për koalicionet si dhe procedura tjera teknike. Prej sot deri më 11 nëntor partitë politike do të kenë mundësi të aplikojnë për tu certifikuar për zgjedhjet e jashtëzakonshme të dhjetorit. Gjithashtu fushata parazgjedhore, do të fillojë prej 1 deri më 10 dhjetor. Kryetarja Daka gjithashtu ka lexuar një deklaratë në emër të KQZ-së, përmes së cilës ka garantuar se në bashkëpunim me partitë politike, procesi zgjedhor do të jetë demokratik, i rregullt dhe transparent. Daka gjithashtu u ka bërë thirrje subjekteve politike që të kenë parasysh afatet e shkurtuara për zgjedhjet e përgjithshme të 12 dhjetorit.