FER, alternativa për zhvillim

Partia më e re në Kosovë, Fryma e Re, është në aleancë me popullin dhe zotohet se do të punojë për përmirësimin e jetës së qytetarëve. Ky subjekt drejtohet aktualisht nga personalitete të reja, të shkolluara jashtë, ekspertë të fushave të ndryshme dhe të papërlyer në afera korruptive, ka thënë Ilir Deda, bashkëthemelues i partisë politike Fryma e Re në një intervistë për “Kosova Sot”. Në interesimin se si po ecën puna në në shtrirjen e strukturave të në teren, Deda thotë se "puna po ecën mjaft mirë, sipas dinamikës që e kemi paraparë. Mund të konfirmoj se Fryma e Re është përhapur dhe po përhapet në të gjithë Kosovën, dhe shumë shpejt do të dalim publikisht me strukturën tonë. Populli i Kosovës është zgjuar, dhe njerëzit po bashkohen në Frymë për një të tashme dhe të ardhme më të mirë". Sipas Ilir Dedës, Fryma e Re mëton ta ndryshojë rrënjësisht skenën politike në Kosovë. Sa i përket “peshqve të mëdhenj” ata janë zënë në rrjetë të cilën ia kanë bërë vetvetes. Ka ardhur koha për një lidership të ri dhe ndryshime të mëdha në Kosovë.
"Fryma e Re do t’ia kthejë dinjitetin dhe pronësinë e Kosovës qytetarit të saj. Transparenca qeverisëse dhe llogaridhënia ndaj taksapaguesit janë parimet e funksionimit të çdo institucioni. Qeveria e udhëhequr nga Fryma e Re nuk do të jetë privilegj dhe formë e pasurimit, por përgjegjësi ndaj popullit të Kosovës. Demokracia nuk do të jetë retorikë, por praktikë e funksionimit të institucioneve në Kosovë. Në aspektin programor, zhvillimi i vërtetë ekonomik me vende të reja të punës, dhe ligji e rendi që në vepër do të jenë përmbi çdo individ, do të jenë qendra e fokusit të qeverisjes", ka thënë Ilir Deda