Siguria, kusht edhe për zhvillim ekonomik

Komandanti i KFOR-it, gjenerali Erhard Buhler, deklaroi të premten se siguria nuk ka vetëm dimensionin ushtarak, por edhe atë politik, ekonomik dhe social dhe se gjendja e sigurisë në Kosovë në përgjithësi mundëson zvogëlimin e pjesëtarëve të forcave paqeruajtëse. Buhler i bëri këto komente pas një takimi që zhvilloi me kryetarin e OEK-ut, Safet Gërxhaliu.

“Kemi një lidhje të veçantë në mes të gjendjes së sigurisë dhe zhvillimit ekonomik dhe, natyrisht, nëse interesohemi për sigurinë e një vendi atëherë do të interesohemi edhe për zhvillimin ekonomik të tij. Në takimin e sotëm u dakorduam që do të mbetemi fillimisht në kontakt dhe së shpejti do të sjell një delegacion nga Gjermania, i cili do të vizitojë edhe Odën Ekonomike të Kosovës. Konfirmova edhe një herë se reduktimi i KFOR-it ka të bëjë me përmirësimin e gjendjes së sigurisë në Kosovë dhe sigurisht edhe njëherë duhet të theksojmë se gjendja e sigurisë në Kosovë në përgjithësi është ndryshe nga ajo që perceptohet në disa qarqe evropiane”, tha komandanti i KFOR-it, njofton Koha.

Gërxhaliu theksoi se OEK-u është i nderuar me vizitën e komandantit të KFOR-it. “Dikush mund të pyetet se çka e karakterizon punën e komandantit Buhler, një miku të madh të Kosovës. Ajo është ofrimi i një strategjie dhe pragmatizmi në fushën e sigurisë së Kosovës, që është parakusht për investime të huaja dhe njëkohësisht i kontribuon përmirësimit të imazhit të dëmtuar të vendit tonë”, tha Gerxhaliu. Ai vlerësoi lartë angazhimin e gjeneralit Buhler në luftë kundër informalitetit dhe kontrabandës në pjesën veriore të Kosovës