Riatdhesimi, kusht për liberalizimin e vizave

E dhimbshme për të kthyerit, por riatdhesimi është kusht për liberalizimin e vizave. Kosova këtë vit do t’i riatdhesojë 5 mijë qytetarë nga shtete të ndryshme të Evropës.
Institucionet e vendit me disa shtete ka arritur marrëveshje për riatdhesim. Deri më tani janë nënshkruar 12 marrëveshje për riatdhesim, e fundit ka qenë ajo me shtetet e Beneluksit, Belgjikën, Holandën dhe Luksemburgun, shkruan Zëri.
Nuk patën kaluar as 6 ditë prej kur ishte arritur kjo marrëveshje e në Kosovë në fundjavën e kaluar janë riatdhesuar vetëm nga Belgjika 150 persona.
“Kosova shumë shpejt do të nënshkruajë edhe disa marrëveshje riatdhesimi, në mesin e shteteve e shteteve me të cilat do t’i bëjmë këto marrëveshje do të jetë Mali i Zi”, thotë Islam Caka, drejtor i Departamentit për shtetësi, azil dhe emigracion në Ministrinë e Punëve të Brendshme.
Autoritetet në Prishtinë, riatdhesimin e kanë quajtur shpesh sfidë për Kosovën, por thonë se nuk do të ketë fluks të madh të kthyerish, pasi Kosova nuk ka kapacitete për këtë.
“Ne mundohemi që me gjithë gjitha kapacitetet që i kemi të krijojmë kushte për ripranimin, riintegrimin, akomodimin, madje të riatdhesuarit e vazhdojnë pa problem shkollimin aty ku e kanë lënë nga vendet prej nga vijnë”, tha Caka.
Republika e Kosovës, pas pavarësimit ka marrë të gjitha përgjegjësitë për shtetasit e saj, të cilët gjenden përkohësisht jashtë vendit dhe që nuk e kanë rregulluar statusin e tyre legal. /Telegrafi/