Bisedimet për liberalizimin e vizave duhet të fillojnë

Komisioni Evropian dhe autoritetet në Kosovë duhet të fillojnë bisedimet për liberalizimin e vizave, tha të enjten kryesuesi i delegacionit për marrëdhënie me vendet e Evropës juglindore në Parlamentin Evropian, Eduard Kukan. Ai tha se duhet t’i kushtohet një vëmendje përmbushjes së obligimeve nga ana e Kosovës, për fillimin e këtij procesi, që sipas tij, nuk do të merr edhe shumë kohë.
“Mendoj se pas publikimit të raportit të progresit, bisedimet midis Komisionit Evropian dhe autoriteteve në Kosovë për liberalizimin e vizave duhet të fillojnë, por nuk e di se kur. Për mua është pozitive që tani Komisioni Evropian nuk ka pretekst që ta neglizhojë këtë proces. Kjo do të thotë që dialogu do të fillojë shpejt”, tha Kukan në një intervistë për Radio Kosovën.

Ndërsa sa i përket dialogut ndërmjet Prishtinës dhe Beogradit, Kukan thotë se procesi duhet të fillojë pas përfundimit të zgjedhjeve në Kosovë. “Mendoj se dialogu duhet të fillojë atëherë kur të konstituohet qeveria e re e Kosovës dhe mendoj se nuk do të jetë kjo kohë e gjatë e cila duhet të pritet për fillimin e këtij procesi, i cili besoj se do të jetë serioz dhe me shumë përgjegjësi”.