Kosovës i duhet strategjia për liberalizimin e vizave

Në Bruksel ka përfunduar të enjten konferenca “Ballkani Perëndimor drejt një Evrope më të integruar”, e cila u organizua nga Parlamentit Evropian dhe Parlamenti i Hungarisë, vend kryesues i radhës i Bashkimit Evropian. Kosovën e përfaqësoi kryetari i Kuvendit, Jakup Krasniqi, ndërsa organizatorët e konferencës kritikuan mospjesëmarrja e Serbisë.
Kryetari i Parlamentit të Hungarisë shprehu keqardhje për bojkotin nga Serbia, duke thënë se “Serbia duket të ketë problem me vetveten, sepse ajo nuk po e kupton nëse është ajo vetë që dëshiron t’i bashkëngjitet Bashkimit Evropian apo duhet ky i fundit t’i bashkohet Serbisë”. Ai ka thënë se Kosova ka të drejtë të marrë pjesë në takime të tilla, sepse Kosova, për shkak të mosnjohjes nga pesë vendet anëtare, nuk ka kontakte institucionale me BE-në. Prandaj, sipas tij, Serbia nuk ka arsye të bojkotojë takime të tilla për shkak të Kosovës.

Në seancën e sotme plenare, Krasniqi sërish e mori fjalën dhe midis tjerash tha se motivi i qytetarëve të Kosovës për integrim në BE duhet të shndërrohet në energji aktive dhe potencial veprues për ëndrrën evropiane të Kosovës. “Lëvizja e lirë u duhet qytetarëve tanë që të mos mbahen të izoluar. Ne nuk kërkojmë liberalizimin e vizave pa përmbushjen e kritereve, prandaj po bëjmë përpjekjet për të cilat fola dje në Grupin e Punës. Për ne paraqitet si nevojë e ngutshme Strategjia e liberalizimit të vizave”, theksoi kreu i legjislativit të Kosovës, thuhet në një komunikatë për media.

Kryetari Krasniqi vlerësoi se Kosova po dëmtohet shumë për faktin që pesë vende të BE-së nuk e kanë njohur ende shtetësinë e saj. “Ne u bëjmë thirrje atyre që ta njohin Kosovën, që ajo të mos mbetet peng i mosnjohjes dhe që të mund të ecim edhe ne përkrah fqinjëve tanë drejt integrimit evropian dhe prosperitetit të përgjithshëm”, theksoi ai. /Telegrafi/