Gjatë verës, udhërrëfyesi për liberalizimin e vizave

Ministri i Integrimeve Evropiane, Besim Beqaj, duke shprehur optimizëm se edhe Kosova, në një afat shumë të shkurtër kohor, do ta ketë udhërrëfyesin për liberalizimin e vizave, thotë se proceset në këtë drejtim janë duke ecur me sukses.
“Unë kam marrë konfirmimin se shumë shpejt do të hapet dialogu zyrtar dhe do të merret udhërrëfyesi për liberalizimin e vizave. Unë shpresoj që kur them shumë shpejtë, do të thotë që brenda verës kjo do të ndodhë dhe praktikisht ne do të fillojmë edhe në baza zyrtare të përditshme për të komunikuar që Kosova të mos mbetet shumë pas vendeve që do të përfshihen në liberalizim”, citohet Beqaj nga Kosova Sot.

Ministri thotë se lëvizjet e Kosovës në këtë drejtim janë shumë pozitive, kurse intensifikimi i vizitave në Bruksel do të jetë edhe më i ngjeshur dhe atje do të dërgohen të gjitha rezultatet që lehtësojnë këtë proces.

Beqaj mendon se faza finale e integrimit të Kosovës në BE “nuk do të jetë shumë me dallime të mëdha nga vendet e tjera të rajonit”. Ai është i kënaqur që ka përkushtim nga KE dhe mekanizmat tjerë për t’i dhënë Kosovës perspektivë evropiane.