Prapaskenat nga mbledhja e sotme e Kuvendit

Prishtinë, 2 nëntor - Përtej pjesës formale të seancës së sotme të Kuvendit, deputetët janë kujdesur për relaksimin e situatës ndonjëherë me tensione, raporton KTV. Fjalimi i Behxhet Pacollit, u ka shkaktuar të qeshura deputetëve, ndërsa kryeministri Thaçi duket se tregoi fuqinë mbi kryetarin e AKR-së kur ia ndali mikrofonin dhe kërkoi t’i aktivizohej sërish. Këtë e ka bërë nëpërmjet kryekuvendarit Krasniqi, duke konfirmuar në fund të mandatit të tij kontrollin e Parlamentit nga Qeveria. Kërkesa e Pacollit për tre minuta shtesë merr konfirmimin nga shefi i Qeverisë. Fytyra e Thaçit merr pamje tjetër, besa edhe merr shënime, kur Ardian Gjini i AAK-së kishte nisur t’ia numëronte dështimet qeverisë. Një mundësi më të mirë për ta promovuar librin për fëmijë, deputeti veteran, Mark Krasniqi, as që e ishte menduar. Fillimisht kolegëve deputetë u kishte dhuruar librin me nënshkrime, ndërsa më vonë Ramë Buja i PDK-së e citon titullin e librit: “Mos fol gojë pa nevojë” . Për ta relaksuar seancën ndonjëherë me tensione kujdesen edhe deputetë të tjerë, e këtu s’ka si të mos e shfaqin protagonizmin e tyre të pavarurit Driton Tali e Naim Rrustemaj. Riza Smaka zgjidhte fjalëkryqin derisa fliste kryeministri, ndërsa deputetët minoritarë nuk u besonin syve kur lexojnë shkrimin në gazetë se kryeministri po largohet.