Sot caktohet mbledhja e parë e parlamentit të ri

Prishtinë, 10 shkurt - Presidenti në detyrë i Kosovës, Jakup Krasniqi, ka ftuar për sot përfaqësuesit e partive parlamentare të legjislaturës së re, të dalë nga zgjedhjet e 12 dhjetorit. Mbledhja do të mbahet në ambientet e Presidencës dhe sipas ftesës, duhet të fillojë në orën 11.
Në këtë mbledhje duhet të caktohet seanca konstituive e parlamentit të ri. Ajo, sipas Rregullores së punës së Kuvendit, nuk mund të mbahet para pesë ditësh nga dita e caktimit. Sipas kësaj, deputetët e legjislaturës së katërt do të mblidhen të martën.
Në rendin e ditës së asaj seance parashihet të hyjë formimi i komisioneve të përkohshme për verifikimin e kuorumit dhe të mandateve, si dhe zgjedhja e kryetarit dhe e pesë nënkryetarëve të Kuvendit.
Deri në zgjedhjen e kryetarit dhe të nënkryetarëve, mbledhjen konstituive do ta udhëheqë deputeti më i vjetër, i ndihmuar nga deputeti më i ri, sipas moshës. Pas verifikimit të mandateve dhe sigurimit të kuorumit, parashihet të bëhet betimi i deputetëve. Deklaratën e betimit do ta lexojë kryesuesi i mbledhjes, ndërsa deputetët në fund të deklaratës do ta shqiptojnë fjalën “Betohem”. Më pas secili nga ta duhet ta nënshkruajë atë deklaratë. Deputeti që mungon në mbledhjen konstituive, kur bëhet betimi, e ka për obligim që të betohet në mbledhjen e parë të radhës. E ata që nuk pranojnë fare të betohen, rrezikojnë të mos i marrin fare kartelat e deputetit.
Kuvendi i Kosovës, të enjten, do t’i hapë dyert për regjistrimin e kandidatëve të partive politike që kanë fituar besimin e qytetarëve për t’u bërë deputetë të legjislaturës së katërt.
Ndërkohë, Kryesia e Kuvendit e mandatit të kaluar pritet të zhvillojë një takim me drejtuesit e shumicës së partive parlamentare.
Një nga anëtarët e Kryesisë ka bërë të ditur se në atë takim do të diskutohen modalitetet rreth mbajtjes së seancës konstituive të Kuvendit, pa përjashtuar mundësinë e ndarjes së hapësirave ku do të sistemohen grupet e veçanta parlamentare.
Sistemimi i grupeve, sipas tij, parashihet të bëhet sipas numrit të deputetëve të secilës forcë politike. Nëse dy apo më shumë parti parlamentare kanë numër të njëjtë të deputetëve, atëherë renditja e tyre në sallë, bëhet sipas shortit.