Çitaku falënderon Maldivet për njohjen e Kosovës

Vlora Çitaku dhe Ahmed Shaheed
Zëvendësministrja e Punëve të Jashtme, Vlora Çitaku, priti të premten në Prishtinë ministrin e Punëve të Jashtme të Maldiveve, Ahmed Shaheed. Palët bashkëbiseduese shprehën gatishmërinë që të intensifikojnë marrëdhëniet bilaterale në fusha me interes të përbashkët dhe të thellojnë miqësinë e sinqertë ndërmjet dy vendeve dhe popujve.
Zëvendësministrja Çitaku në emër të institucioneve të Republikës së Kosovës shprehu falënderimin për njohjen e shtetit të Kosovës nga Republika e Maldiveve dhe për vendosjen e marrëdhënieve diplomatike. Ajo tha se Republika e Maldiveve ka dëshmuar të jetë shtet mik edhe me përkrahjen e treguar në proceset e vendimmarrjes dhe votimit të rezolutave dhe të anëtarësimit të Kosovës në organizata ndërkombëtare.

Ministri Shaheed konfirmoi përkrahjen e plotë për Republikën e Kosovës nga ana e Republikës së Maldiveve, duke siguruar se kjo përkrahje nuk do të pësojë ndryshime pavarësisht ndërrimeve demokratike të qeverisë në vend.