Rexhepi: I njëjti koalicion do të qeverisë edhe pas 12 dhjetorit

Fatmir Rexhepi ka shfrytëzuar një takim të degës së LDK-së në Gjilan për ta shpalosur projektin e tij të distancimit nga kryetari i ri i Lidhjes Demokratike të Kosovës, Isa Mustafa, duke qenë se ai nuk pajtohet me Mustafën dhe lidershipin e tashëm të partisë.
“Unë nuk e përkrah Isa Mustafën me këtë fasadim dhe maskim dhe duke mos u pajtuar me këtë skenar u tërhoqa nga të gjitha strukturat e LDK-së”, ka thënë Rexhepi, sipas Express.

Rexhepi u tërhoq nga LDK, pasi që Isa Mustafa publikoi emrat e anëtarëve të rinj të Kryesisë dhe Këshillit të Përgjithshëm të LDK-së, ndërsa në fjalën e tij para strukturave të degës së LDK-së, Rexhepi tha se reformat në parti nuk do të ndodhin, unifikimi i fraksioneve nuk do të ndodhë, unifikimi me Familjen Rugova nuk do të ndodhë, dhe po ashtu nuk do të ndodhë unifikimi me AAK-në dhe LDD-në.

Sipas Rexhepit, me formatimin e Këshillit Drejtues dhe më pas edhe të Kryesisë së LDK-së u pa hapur se Mustafa tradhtoi besimin e delegatëve të LDK-së.

“Mustafa ka privilegjuar klanin, i cili qysh tash është në koalicion me PDK-në”, ka thënë Rexhepi, sipas të cilin njëjti koalicion do të qeverisë edhe pas zgjedhjeve të 12 dhjetorit.

“Unë nuk do ta përkrah Isa Mustafën dhe projektin e tij e as lidershipin e tij të partisë, prapa të cilit fshihet koalicioni me PDK-në”, ka thënë ai.

Ndërkaq, Lutfi Haziri, kryetar i degës së LDK-së në Gjilan, ka thënë se ajo çfarë ka folur Fatmir Rexhepi është çështje e tij personale, por nuk përfaqëson degën e LDK-së dhe elektoratin e partisë në Gjilan.