Pacolli s’do koalicion ku do të ishte edhe AAK-ja

Kryetari i AKR-së, Behgjet Pacolli, ka thënë se në koalicionin e ardhshëm me PDK-në duhet të jetë vetëm AKR-ja, ose AAK-ja, e jo që të dyja bashkë. Në një intervistë për Express, ai ka thënë se nuk ka kurrfarë inati apo vija të kuqe me AAK-në, por nuk mund të bëhen shumë parti në koalicion.
“Unë nuk kam kurrfarë averzioni ndaj AAK-në. Nuk kam vija të kuqe me AAK-në, mirëpo një frikë e kam. Nëse do të jetë AAK-ja dhe PDK-ja së bashku, më duket se hapësira jonë do të jetë shumë e reduktuar dhe veprimet tona nuk do të vërehen. Për atë, unë nuk do të jem i interesuar për këtë formulë qeverisëse”, ka thënë Pacolli.
Ai edhe njëherë i është kthyer deklaratave Lila – Limaj. Pacolli ka thënë se qëndrimet e Kusarit janë edhe të AKR-së, por përmendja e emrit të Limajt ka ardhur në një kontekst tjetër, dhe për këtë i kërkoj falje atij. Mos ta harrojmë, ka shtuar Pacolli, se edhe Limaj ka qenë i ashpër në deklaratat e tij.