Bisedimet mund të sjellin rreziqe

Kosova përgatitet për zgjedhje të jashtëzakonshme, ndërkohë që qeveria e re do të përballet me mundësinë e bisedimeve për të ashtuquajtura çështje praktike me Beogradin. Analisti amerikan, James Pettifer, mendon se bisedime të tilla mund të shoqërohen me rreziqe dhe qeveria e Kosovës mund të mos jetë e përgatitur.
Historiani dhe analisti, James Pettifer, është autor i disa librave për Ballkanin dhe thotë se është duke shkruar një histori të Ushtrisë Çlirimtare të Kosovës, njofton Radio Zëri i Amerikës.

Ai mendon se bisedime të tilla përveçse i rrisin Serbisë legjitimitetin dhe imazhin në komunitetin ndërkombëtar, shoqërohen me rreziqe. “Qeveria e Kosovës nuk është sa duhet e qartë për rreziqe të tilla. Sepse është e lehtë të fillosh të bisedosh për këto gjëra, por pastaj mund të vihesh përpara trysnisë për të biseduar mbi diçka tjetër”.

Ndërkaq, evropianët nuk po arrijnë të flasin me një zë të vetëm për Kosovën. Pesë vende të Bashkimit Evropian ende nuk e njohin sovranitetin e shtetit të ri dhe çështja që shtrohet është se, a mundet që në këto kushte, Bashkimi Evropian të ketë rol udhëheqës në këto bisedime?

“Çështja më e madhe këtu është nëse Bashkimi Evropian mund të verë rregull në shtëpinë e vet, pra që çdo vend i tij pa përjashtim ta njohë Kosovën e pavarur. Nëse nuk e bëjnë dot këtë, ata nuk mund të kenë rol drejtues në këto bisedime”, thotë profesor Pettifer.

“Bashkimi Evropian po zbaton standarde të dyfishta sepse asgjë nuk thuhet për rolin e Beogradit në destabilizimin e Kosovës veriore, ose për strukturat paralele dhe rolin e qeverisë serbe në aktivitete të ndryshme atje. E gjitha kjo është lejuar dhe në këtë mënyrë, sundimi i ligjit kërcënohet”.

Nuk është e qartë nëse Bashkimi Evropian ka një plan konkret për atë se çfarë mund të përmbajnë bisedimet e ardhshme për çështjet praktike, por nëse ekziston, të paktën deri tani asnjë plan i tillë nuk është bërë publik.