Kosovarëve u bie optimizmi

“Tradicionalisht, që kur ne nisëm t'i bënim këto sondazhe, kosovarët kanë qenë më optimistët në rajon, më të kënaqur me situatën e tyre materiale. Tani, në 2010-n, nuk mund të thuhet e njëjta gjë. Banorët ankohen për situatën e vështirë ekonomike”,thotë Andrzej Pyrkal nga ‘Gallupi’. Kriza ekonomike globale po i godet rëndë banorët e rajonin të Ballkanit Perëndimor dhe ky është njëri nga faktorët që po ndikon negativisht dhe në besimin e tyre tek institucionet. Ky është një nga përfundimet e sondazhit të përvitshëm të realizuar nga ‘Gallupi’, një firmë konsulencash e specializuar në kryerjen e sondazheve, në bashkëpunim me Fondin Evropian për Ballkanin- një iniciativë e fondacioneve evropiane që mbështet iniciativat të cilat synojnë afrimin e rajonit në Bashkimin Evropian. Sondazhi, i cili njihet si monitori ballkanik, synon të ndjekë fenomenet dominante në 7 vendet aspirante për anëtarësim në bllok. Për edicionin e tij të dytë u intervistuan nga një mijë vetë në secilin vend për një seri çështjesh: që nga gjendja ekonomike, tek korrupsioni, besimi në institucione, deri tek dëshira për të migruar. Pyrkal shton se kanë kaluar 15 vjet që nga konfliktet e mëdha në Ballkan dhe vendet janë në rrugën drejt integrimit evropian dhe pritet që demokracitë të bëhen më të qëndrueshme, më të shëndetshme dhe që njerëzit të nisin të kenë besim tek to. Lidhur me korrupsionin Pyrkal thotë se tradicionalisht kjo përqindje është shumë e lartë në gjithë Ballkanin perëndimor. “Në Shqipëri, që ka një nga përqindjet më të vogla, është 69 për qind dhe në Kosovë, Kroaci e Bosnjë e Hercegovinë është mbi 85 për qind”.