Rasmussen: Reduktimi i KFOR-it varësisht nga situata

Sekretari i Përgjithshëm i NATO-s, Anders Fogh Rasmussen, tha se NATO do të pakësojë numrin e trupave në Kosovë. Ai tha se zvogëlimi i trupave do të bëhet varësisht nga vlerësimet politike e ushtarake.
Rasmussen tha kështu të premten në Shtabin Qëndror të KFOR-it në Prishtinë, ku po kryeson vizitën e një delegacioni të Këshillit të Aleancës Veri-Atlantike, në përbërje të cilit janë edhe kryesuesi i Komitetit Ushtarak të NATO-s, admirali Giampaolo di Paola, dhe komandanti i Forcave të Përbashkëta Aleate të komandës në Napoli, admirali Mark Fitzgerald.

Rasmussen paralajmëroi se nga 10 mijë sa janë tani, numri i ushtarëve të Aleancës në Kosovë mund të zvogëlohet në 5 mijë e 700 trupa.

Rasmussen nga gazetarët është pyetur edhe rreth hetimeve që EULEX po bënë në Kosovës rreth korrupsionit. Ai tha se mbështetë hetimet për korrupsion dhe krim të organizuar që misioni i EULEX-it është duke i zhvilluar. Por shtoi se kjo çështje megjithatë i takon gjyqësisë dhe vet EULEX-it.

Por në lidhje me hetimet, Rasmussen kërkoi nga qytetarët e Kosovës, se duhet të mësohen edhe me hetime të ndryshme pasi tha se Kosova vetëm kështu mund të ecë përpara.

“Mendoj se hetimet duhet të vazhdojnë. Duhet të jemi të sigurt se këto aktivitete janë të bazuara në sundimin e ligjit. Njerëzit që shkelin ligjin duhet të dalin para drejtësisë. Në fund të fundit qytetarët e Kosovës do ta pranojnë se kjo është në dobi të së ardhmes së tyre", tha Rasmussen.

Ndërkaq, komandanti i KFOR-it gjenerali Markus Bentler tha se për çdo rast eventual përkeqësimi të situatës së sigurisë, KFOR-i do të jetë këtu që të reagojë edhe nëse siguria rrezikohet për shkak të këtyre hetimeve.

Rasmussen dhe Bentler kanë dënuar sulmin që i është bërë KFOR-it ditë më patë në veri të Mitrovicës duke e cilësuar atë si një akt individual. Pikërisht veriu i Kosovës, ishte edhe destinacioni i radhës së këtij delegacioni nga Aleanca Veriatlantike. /RTK/