Situata e sigurisë në Mitrovicë më e qeta në 15 muajt e fundit

Komiteti për siguri lokale të kuvendit të komunës së Mitrovicës
vlerësuan se situata e përgjithshme e sigurisë në këtë komunë gjatë dy
javëve të fundit, ka qenë më e qeta në 15 muajt e fundit. Drejtor
i për Mbrojtje dhe Shpëtim, Behxhet Balës tha se gjatë periudhës së
fundit dyjavore nuk ka pasur ndonjë incident që do të reflektohej në
situatën e përgjithshme.
Ai tha se protestat që gjatë kësaj kohe janë organizuar në komunën e
Zubin Potokut, kundër pranisë së policisë së trafikut dhe Njësitit
special të policisë së Kosovës atje, nuk kanë ndikuar në situatën e
sigurisë në komunën e Mitrovicës.
“Këto protesta të paarsyeshme kanë për qëllim pengimin e policisë në
atë pjesë të Kosovës, në mënyrë që keqbërësit t’i vazhdojnë të papenguar
veprimet e tyre kriminale dhe kontrabandën e mallrave, nga të cilat ata
përfitojnë shumë”, ka thënë Bala.
Edhe në këtë takim, drejtori Bala përmendi shqetësimin e qytetarëve
jo serbë në lagjet veriore për shkak të përdorimit të targave të
automjeteve që i lëshon Republika e Serbisë, brenda Republikës së
Kosovë” dhe shqetësimin e qytetarëve të tjerë të komunave të rajonit,
për shkak të mosfunksionimit normal të organeve të gjyqësisë në
Mitrovicë.
Komandanti i stacionit jugor të policisë në Mitrovicë, Avni Zabeli
tha se policia ka qenë e angazhuar maksimalisht gjatë dy javëve të
fundit për realizimin e planeve operative të policisë, për luftimin e
krimit të organizuar dhe kontrabandës.
Sipas tij, gjatë kësaj periudhe kohore veprat kriminale kundër pronës
dhe pasurisë kanë shënuar rënie për 40 për qind, ndërkohë që numri i
rasteve të veprave penale të kontrabandës është shtuar. /Telegrafi/