Kelmendi më e mira, edhe sipas RTV 21

Prishtinë, 8 janar - Xhudistja Majlinda Kelmendi të premten është shpallur sportistja më e mirë e vitit 2010 në Kosovë nga RTV 21. Kelmendi, 19-vjeçare, për herë të tretë u shpall më e mira nga ky radiotelevizion. Ajo mori pikë maksimale (70) nga juria e shtatë komunave më të mëdha të vendit. Në vendin e dytë u rendit kapiteni i skuadrës së futbollit Trepça, Elvis Osmani, që mori 51 pikë. Ndërkaq, i treti, me 44 pikë, ishte basketbollisti i Sigal Prishtinës, Edmond Azemi.
"Ndihem shumë mirë që u shpalla për herë të tretë sportistja më e mirë nga RTV 21. Falënderoj trajnerin tim Driton Kukën, pa të cilin nuk do t'i arrija këto suksese. Shpresoj që në 2011 të kem më shumë përkrahje nga institucionet e vendit", ka thënë Kelmendi. Ajo është kampione e Evropës për juniore. Më herët Kelmendi u shpall më e mira e vitit edhe nga Grupi KOHA.