Istogu sot voton per kryetarin e komunes

Në rrethin e dytë të zgjedhjeve të jashtëzakonshme për kryetar të Komunës së Istogut, sot, përballën kandidati i LDK-së, Haki Rugova dhe kandidati i PDK-së, Shasivar Haxhiaj.
Lidhja Demokratike e Kosovës dhe Partia Demokratike e Kosovës, kandidatët e të cilave garojnë në balotazhin e 9 majit për kryetar të Komunës së Istogut, kanë përmbyllin të premten fushatën parazgjedhore pesëditore dhe në mesnatë ka nisur heshtja para zgjedhjeve që do të mbahen të dielën.
Zyrtarët e Komisionit Qendror Zgjedhor kanë njoftuar se i kanë bërë të gjitha parapërgatitjet për rrethin e dytë të zgjedhjeve të jashtëzakonshme për kryetar të Komunës së Istogut, të cilat mbahen të dielën pasi asnjëri nga pesë kandidatët për kryetar komune nuk arriti të fitojë vota të mjaftueshme në zgjedhjet e jashtëzakonshme të 11 prillit, që u organizuan pas vdekjes së ish-kryetarit Fadil Ferati.
Komisioni Qendror Zgjedhor ka emëruar këshillat e vendvotimeve për këto zgjedhje. Sekretariati i KQZ-së ka bërë të ditur se nga 55 vendvotime, janë 54 këshilla të vendvotimeve, ndërsa për vendvotimin në fshatin Osojan të banuar me serbë, do të jetë një ekip mobil nga KQZ-ja. Të drejtë vote kanë 39.307 qytetarë, të cilët gjatë këtij procesi votat e tyre mund t'i hedhin në 15 qendra të votimit dhe 55 vendvotime.
Në zgjedhjet e balotazhit, më 9 maj, për kryetar të Komunës së Istogut përballën kandidati i LDK-së, Haki Rugova, i cili në zgjedhjet e jashtëzakonshme që u mbajtën më 11 prill fitoi 7.349 vota ose 49.34% dhe kandidati i PDK-së, Shasivar Haxhiaj, i cili në këto zgjedhje ka fituar 3.249 vota ose 21.81%.
Siç dihet në zgjedhjet e jashtëzakonshme për kryetar të Komunës së Istogut që u mbajtën pas vdekjes së ish-kryetarit të kësaj komune, Fadil Ferati, patën garuar edhe Muhamet Shatri (AAK) që ka fituar 3.207 vota ose 21.53%, Rifat Osmanaj (LDD) që ka fituar 585 vota ose 3.93% dhe Ismet Mulaj (AKR) që ka fituar 506 vota ose 3.40%.