Ndërtimtarët protestojnë para Komunës së Prishtinës

Problemet të cilat Komuna e Prishtinës është duke ua shkaktuar bizneseve që merren me ndërtimtari dhe infrastrukturë e kanë shtyrë Departamentin për ndërtim dhe infrastrukturë të Aleancës Kosovare të Biznesit(AKB) që të marrë vendim për protestë, në shenjë pakënaqësie ndaj zyrtarëve të urbanizmit. Ata të hënën do të mbajnë një mbledhje me komunitetin e biznesit dhe do të marrin vendim të prerë për protestë para Drejtorisë së Urbanizmit.

Ndër problemet kryesore me të cilat ballafaqohen investitorët e huaj dhe vendorë janë procedurat burokratike për dhënien e lejeve të ndërtimit në Komunën e Prishtinës, shkruan Kosova Sot.

Kjo sipas ekspertëve është pengesa kryesore, e cila, përveç humbjeve të të hyrave buxhetore që i shkakton vetë komunës, shkakton probleme të mëdha edhe në zhvillimin ekonomik të vendit. Vonesat për marrjen e një leje ndërtimi, që zgjasin deri në katër vjet, e pengojnë dhe e largojnë çdo investitor të huaj.

Hamdi Jaha, kryesues i Departamentit për ndërtim e infrastrukturë në AKB, tha se janë në bisedime me firmat ndërtimore. Ai tha se javën e ardhshme do të marrim një vendim të prerë, i cili ka për qëllim t’ i japë fund pengesave dhe zvarritjeve që Komuna e Prishtinës po ua shkakton.

Si pasojë e zvarritjes dhe mosdhënies së lejes së ndërtimit, shumë biznese, sipas Jahës, janë detyruar të shuhen. Ka edhe raste kur një biznes është detyruar të zbresë numrin e punëtorëve nga 400 në 20 punëtorë. Ai thotë se, sipas dokumentacionit, janë rreth 50 biznese në shkatërrim e sipër.

Zëdhënësi i Komunës, Muhamet Gashi, ka thënë se nuk është e vërtetë që Komuna nuk po jep leje të ndërtimit.

“Vetëm për dy javë Drejtoria për Urbanizëm i ka dhënë 20 leje ndërtimi”, ka thënë Gashi, i cili nuk kishte njohuri se saktësisht cilave kompani u është dhënë leje për ndërtim. /Telegraf