Barroso e Thaçi vunë gurthemelin e ndërtesës së komunës së Graçanicës

José Manuel Barroso, president i Komisionit Evropian, gjatë vizitës së
sotshme në Kosovë, ka vizituar edhe Graçanicçn. Duke nënvizuar
përkushtimin e BE-së për procesin e decentralizimit, presidenti Barroso,
bashkë me kryeministrin Thaçi dhe kryetarin e komunës Bojan Stojanoviq,
vunë gurthemelin e ndërtesës së re të Komunës së Graçanicës, të
financuar nga BE-ja. Ai po ashtu vizitoi edhe Manastirin e Graçanicës.
Në fund të vizitës së tij, presidenti Barroso theksoi:
"Qëllimi
i vizitës sime është që të konfirmojë mbështetjen tonë të fuqishme për
perspektivën evropiane të Kosovës. Komisioni është i gatshëm që të
vazhdojë të ndihmojë Kosovën në rrugën e saj drejt Evropës. Ne do të
vazhdojmë të punojmë në mënyrë aktive për forcimin e marrëdhënieve tona
tregtare me Kosovën.
Por edhe Kosova mund të ndihmojë vetveten.
Kosova duhet të vazhdojë reformat e saj, të punojë në forcimin e
sundimit të ligjit, t’i japë shtysë zhvillimit shoqëror dhe ekonomik dhe
të zhvillojë raporte të mira fqinjësore. Ajo mund ta bëjë këtë duke
punuar ngushtë me EULEX-in, duke zbatuar politika të shëndosha dhe të
qëndrueshme makroekonomike, duke treguar kujdes fiskal dhe duke qenë
konstruktive, pragmatike dhe kreative në dialogun me Serbinë. Kosova
mund të mbështetet në Bashkimin Evropian dhe mund të mbështetet në
Komisionin Evropian."
Z. Barroso në ketë vizitë në Kosovë ishte i
shoqëruar nga z. Štefan Füle, komisioner i BE-së për Zgjerim dhe
Politikë të Fqinjësisë, z. Stefano Sannino, zëvendës komisioner për
Zgjerim (DG ELARG), z. Miroslav Lajcak, drejtor menaxhues i EEAS
(Shërbimit të Jashtëm të BE-së) për Evropën dhe Azinë Qendrore dhe
zyrtarë të tjerë të lartë të kabinetit të tij.