JVC sjell kamerën E.T.

A Jua kujton pamja frontale e këtij aparati karakterin legjendar fantastiko-shkencor – jashtëtokësorin E.T? Kush e di, ndoshta pikërisht ai ishte inspirim për krijimin e kësaj video-kamere, e cila mundëson xhirim të përmbajtjeve 3D në rezolucion të plotë HD.
Në parimin “e funksionimit të syve të njeriut”, kamera shfrytëzon dy CMOS sensorë me 3,32 megapixelë, nga një për secilin objektiv, me çka mundësohet xhirimi i përmbajtjeve në 3D. Natyrisht ka edhe përkrahjen për krijimin e fotografive 3D, por edhe mundësinë e incizimit të zërit ambiental 3D.
Nuk është asgjë revolucionare, sepse në CES 2010 të vitit të kaluar “Panasonic” kishte prezantuar aparatin e parë të tillë, por GS-TD1 i JVC-së megjithatë sjell një gjë interesante. Sipas JVC, GS-TD1 është video kamera e parë e cila xhiron 3D video në rezolucion të plotë Full HD, dhe i takon segmentit konsumues.
Kjo do të thotë se ky aparat do të jetë sado kudo i pranueshëm për shumicën e shfrytëzuesve - konsumatorëve shtëpiakë, por fatkeqësisht çmimi nuk dihet akoma.