Sa të jem president, Çekia s’do të ketë ambasador në Kosovë

Presidenti çek, Vaclav Klaus ka deklaruar në Beograd se deri sa është ai president, Çekia nuk do të ketë ambasador në Kosovës, pavarësisht faktit se në Prishtinë është hapur ambasada.

Këto komente Klaus i bëri për mediat çeke dje në Beograd, duke shtuar se Serbisë nuk i vjen mirë që në Kosovë është hapur ambasada çeke, mirëpo ka theksuar se në atë ambasadë, në të vërtetë, nuk ka as ambasador, transmeton QIK-u.

“Ambasadorët i emëron presidenti i republikës. Unë e di mirë se ministri i Jashtëm (Karel) Shvarcenberg me dëshirë do të emëronte ambasadorin për Kosovën, mirëpo ai në të njëjtën kohë e di shumë mirë që unë kurrë nuk do ta nënshkruaja. Kështu që ne atje nuk kemi ambasador, dhe përderisa unë të jem president, nuk do të kemi kurrfarë ambasadori atje”, ka thënë Klaus në Beograd, pasi është bërë anëtar nderi i Akademisë (famëkeqe) Serbe të Shkencave.