Shqiptarët me qëndrim unik kundër Martyt

Delegacioni i Shqipërisë në sesionin e Asamblesë Parlamentare të Këshillit të Evropës do të prezantohet me qëndrim unik kundër raportit të Dick Martyt, ndërsa edhe partia shqiptare në pushtet në Maqedoni, BDI-ja, deputetja e së cilës do të merr pjesë në sesionin dimëror, Ermira Mehmeti-Devaja është deklaruar kundër këtij raporti.

Sipas Gazetës Shqiptare, delegacionin e Shqipërisë do të udhëheq kryeministri Sali Berisha, ndërsa Ministria e Jashtme ka përgatitur një raport prej katër faqesh që do t’ia dorëzojë Këshillit të Evropës, si përgjigje zyrtare e Tiranës ndaj raportit të Martyt.

Këshillit të Evropës do t’i dorëzohet edhe peticioni, i iniciuar nga shoqatat e dala nga lufta e UÇK-së, të cilët brenda dy javësh mblodhën nënshkrime në Kosovë, Shqipëri, Maqedoni dhe Luginën e Preshevës që kundërshtojnë projekt-raportin e senatorin zviceran.

Projekt-raporti i Martyt do të jetë në rend ditë të martën në sesionin e Asamblesë Parlamentare të Këshillit të Evropës.

Ndërkohë të mërkurën presidenti i Serbisë, Boris Tadic do t’i drejtohet eurodeputetëve, ndërsa po të njëjtën ditë edhe kryeministri shqiptar, Sali Berisha.