Musa: Kosova të zbatojë reciprocitetin

Prishtinë, 23 janar - Kryesimi i CEFTA-s do të jetë i pavlerë, nëse ne nuk mund të arrijmë të ndryshojmë qasjen e Serbisë dhe Bosnjë-Hercegovinës kundrejt mallrave kosovare, tha për Radion Evropa e Lirë Lekë Musa, kryeshef ekzekutiv në Odën Ekonomike Amerikane në Prishtinë.
“Kryesimi, si i tillë, është jashtëzakonisht me rëndësi, sepse e ngrit Kosovën në një nivel të barabartë me shtetet tjera anëtare të CEFTA-s. Mirëpo, më e rëndësishme se kjo është trajtimi i barabartë sa u përket marrëdhënieve reciproke me vendet anëtare të CEFTA-s.
Dua të them se ky kryesim do të jetë i pavlerë, nëse ne nuk mund të arrijmë që të ndryshojmë qasjen e Serbisë dhe Bosnjë-Hercegovinës kundrejt mallrave kosovare.
Shpresoj se me kryesim do të ndryshojë kjo çështje nga ana e Serbisë dhe Bosnjës. Në të kundërtën, mendoj se Kosova nuk duhet të sillet si e nënshtruar, por duhet të fillojë t’i aplikojë masat e reciprocitetit në lidhje me produktet e veta. Ky është vendi ku duhet treguar patriotizëm, duhet treguar patriotizëm në mbrojtje të ekonomisë vendore, në mbrojtje të vendeve të punës... Shpresoj se do të jetë në nivel të detyrës Qeveria e Kosovës sa i përket mbrojtjes së interesave ekonomike të Kosovës”, tha Musa.
Ndërkaq, në pyetjen se a do ta rrezikojë biznesin në Kosovë zbatimi i vendimit të qeverisë Thaçi për rritjen e pagave të arsimtarëve dhe shërbyesve civile, Musa u përgjigj: “Me të vërtetë rrezikohet ambienti afarist në Kosovë. Bie atraktiviteti i Kosovës, sepse dy institucionet kryesore për mbledhjen e të hyrave - Administrata Tatimore dhe Doganat e Kosovës - do të detyrohen t’i mbledhin këto të hyra për t’i paguar shpenzimet e parapara.
Në shumë raste, ato do të detyrohen që në mënyrë të padrejtë t’i dënojnë bizneset për t’i arritur planet e parapara nga Ministria e Ekonomisë dhe Financave”, u shpreh kryeshefi ekzekutiv i Odës Ekonomike Amerikane në Kosovë, Lekë Musa.


RADIO EEVROPA E LIRË
A ekziston rreziku se ky vendim mund t’i prishë raportet ndërmjet Kosovës dhe Fondit Monetar Ndërkombëtar?

LEKË MUSA
Unë, me sa e di, Qeveria e Kosovës tashmë është në negociata për të rinegociuar këtë marrëveshje me Fondin Monetar Ndërkombëtar. I mbetet Qeverisë së Kosovës të bindë FMN-në se do të jetë në gjendje që t’i mbledhë këto të hyra.

Megjithatë, prapë e them se marrëveshja me FMN-në mund të arrihet, por duhet të shikohet edhe ajo që është më e rëndësishme - perspektiva afatgjate ekonomike e Kosovës.


RADIO EVROPA E LIRË
Kosova këtë vit duhet të marrë presidencën e CEFTA-s. Zyrtarë të qeverisë thonë se Kosova tashmë ka marrë kryesimin, por në praktikë nuk shihet asgjë konkrete. Çfar po ndodh sipas jush me këtë projekt rajonal?