Zjarrfikësit e FSK-së certifikohen nga KFOR-i

Prishtinë, 28 janar – Është kryer me sukses trajnimi tre javor i 13 zjarrfikësve të Njësisë së Zjarrfikësve të Regjimentit të Mbrojtjes Civile të FSK-së, nga KFOR-i, në Film City, njofton me një komunikatë Ministria e FSK-së. Në ceremoninë e certifikimit morën pjesë shefi i Divizionit Këshillues Civil-Ushtarak, gjeneral brigade Enrico Espagnoli nga KFOR-i, komandanti i Brigadës së Reagimit të Shpejtë (BRSH) të FSK-së, gjeneral brigade Imri Ilazi dhe koloneli Skënder Hoxha.
Spagnoli i uroi pjesëmarrësit për përfundimin e suksesshëm të kursit. “Këto tri javë, sa ka zgjatur trajnimi, kanë qenë të ngarkuara, si në aspektin fizik dhe psikik, por ju sot treguat performancë profesionale të shkëlqyeshme gjatë ushtrimit. Ky kurs është një shembull i mirë se si duhet të funksionojë bashkëpunimi ndërmjet KFOR-it dhe FSK-së”, tha përfaqësuesi i KFOR-it.
Gjeneral Imri Ilazi falënderoi KFOR për bashkëpunim të mirë dhe për punën e madhe në
trajnimin e pjesëtarëve të FSK-së. Ai theksoi se njohuritë e fituara në këtë kurs do të jenë ndihmë e mirë për ngritjen e profesionalizmit të FSK-së.
Ky ishte kursi i parë i trajnimit bazik për zjarrfikës pjesëtarë të FSK-së, të trajnuar për raste emergjente të kërkim-shpëtimit, javën e ardhshme trajnimi i njëjtë do të përfundohet nga zjarrfikës të tjerë, pjesëtarë të FSK-së, të dedikuar për aksidente dhe kërkim-shpëtim.