KFOR-it po i sos durimi

I pari i KFOR-it, Erhard Byler, u ka dhënë një mesazh të qartë serbëve, të cilët e kanë bllokuar rrugën që shpie nga Zubin-Potoku deri në pikën kufitare 31. Pasi i ka parë aftësitë e trupave të tij, Byler ka thënë se nuk do të durojë edhe shumë gjatë që rrugët të jenë të bllokuara, duke paralajmëruar kështu ndërhyrjen e KFOR-it në hapjen e kësaj rruge. “Mund t’ju them se nuk kam shumë durim, nuk mund të lejojmë që rrugët kryesore të qëndrojnë të bllokuara”, ka thënë Byler, i cili nuk ka ngurruar të tregojë se këto qëndrime ua ka bërë të qartë edhe protestuesve dhe qytetarëve të Zubin-Potokut, me të cilët ishte takuar mëngjesin e së martës. “Njerëzit po presin që rruga të lirohet, sepse ata janë lodhur me atë bllokadë. Fundja, bashkësia po lodhet me këtë bllokadë”, ka thënë Byler, i cili nuk ka dhënë ndonjë kohë të saktë se kur KFOR-i do të intervenojë për zhbllokimin e kësaj rruge.

Byler ka thënë se nuk ka asgjë kundër protestave, mirëpo, siç ka thënë ai, ushtarët e KFOR-it dhe qytetarët duhet ta kenë rrugën e lirë. “Është normale të protestohet, por ne do të kërkojmë që të hapet rruga, e nëse nuk ndodhë kjo, atëherë ne duhet ta hapim rrugën”, ka thënë Byler.

Deklaratat e të parit të KFOR-it janë bërë gjatë kohës kur KFOR-i dhe EULEX-i po e zhvillonin një trajnim për menaxhimin e turmave të protestuesve në afërsi të pikës kufitare 31. Trajnimi i cili është ndjekur nga afër edhe nga komandanti Byler i ka paraqitur aftësitë e KFOR-it dhe të EULEX-it në menaxhimin e turmave, mirëpo i tërë ky demonstrim nuk ka pasur shumë efekt, pasi vetë KFOR-i është dashur t’i ndiqte rrugët alternative për të arritur në pikën 31. /Kosova Sot/